للتغلب ع التعب ف رمضان

"السهر".. هو السبب الأساسي

أنا شايف إن السبب في ظهور علامات الإرهاق والتعب والكسل على وش أي حد هو السهر طول الليل قدام التليفزيون... كان رمضان بقى معناه مسلسلات وتليفزيون بس.

طيب ما نفكر صح شوية وبلاش نسهر قدام التليفزيون ونكتفي فقط بالفرجة على المسلسلات اللي مواعيد إذاعتها بدري واللي متأخرة دي بلاش منها حتى علشان نقدر نروح شغلنا الصبح واحنا أعصابنا مستريحة ونقدر إننا نشتغل مش نروح ننام على المكتب ولما حد ييجي يكلمنا نقول الصيام والحر...

وعلى فكرة المسلسلات اللي بتتذاع متأخر دي واللي بنقعد قدامها طول الليل بتتذاع بعد رمضان تاني في مواعيد مناسبة جداً لكل الناس.

اللخبطة في الأكل

طبعاً السفرة في رمضان بتكون مليانة بما لذ وطاب من طعام وللأسف الشديد فيه ناس كتير ما بتصدق إن المدفع يضرب وتلاقيها عمالة تاكل وتشرب كأنها أول وآخر مرة تاكل وتشرب فيها وبعد ما تخلص أكل تلاقيها عمالة تاخد فوار مهضم ومش قادرة تاخد نفسها من كتر الأكل!!!!

وييجي وقت السحور تلاقيها مش قادرة تاكل أي حاجة، وبالتالي تاني يوم تلاقيها تعبانة على الآخر.. طيب وليه نعمل في نفسنا كده؟! ما ننظم طريقة أكلنا شوية وناكل على قدنا، ونخلي مكان في معدتنا علشان نشرب سوائل في الفترة من الفطار لغاية السحور علشان نعوض فترة الصيام، وكمان علشان نقدر إننا نتسحر كويس؛ لأن السحور مفيد جداً للجسم.

وكمان الرياضة مهمة جداً

فيه ناس تانية للأسف مش بتمارس أي نوع من أنواع الرياضة في رمضان والحجة إن رمضان وقته ضيق.. على الرغم من أن الرياضة مهمة جداً في رمضان؛ لأنها بتساعد على تنشيط الدورة الدموية في الجسم وزيادة الدم الواصل لخلايا الجسم.

علشان كده ياريت إننا نمارس الرياضة، وأبسط حاجة هي إننا نمشي كل يوم بعد الفطار لمدة نصف ساعة علشان نجدد نشاطنا.

بلاش توتر زيادة عن اللزوم

ياريت الواحد يبقى هادي وبلاش يتنرفز ويتعصب زيادة عن اللزوم بحجة أنه صايم ومش طايق نفسه؛ لأن التوتر بيضر الجسم جداً جداً، وبيخلي الوجه يبان إنه مجهد وتعبان.

تنظيم الوقت

طبعا رمضان هو شهر كله عبادة وقراءة قرآن وصلاة علشان كده ياريت أننا ننظم وقتنا بشكل صح بين الصلاة وقراءة القرآن والصوم وكمان ناخد وقت كافي في النوم علشان نقدر أننا نصحى نروح شغلنا لأن العمل كمان عبادة مش كده ولا إيه؟!

الاهتمام بصحتنا

في ناس كتير نظراً لظروفهم المرضية بيحتاجوا إنهم ياخدوا أدوية باستمرار ودول بانصحهم إنهم ما يهملوش تناول الأدوية دي في رمضان ويسألوا الدكتور على المواعيد المناسبة لتناول الأدوية دي في رمضان.. وينظموا أكلهم في رمضان زي ما الدكتور هيقول لهم.

كمان بانصح الناس اللي بتعاني من الصداع النصفي المزمن إنهم لازم يتناولوا وجبة سحور كويسة وبعدين ياخدوا المسكن الخاص بيهم في السحور علشان يقدورا إنهم يروحوا الشغل ويشتغلوا عادي جداً من غير ما يحسوا بأي إرهاق أو تعب.

كلام صح اوى والله يافدوى
ومعلومات مهمة ومفيدة
ميرسى ليكى وتقبلى مرورى